Aktibong COVID-19 cases sa Pilipinas 'highest sa mahigit 4 na buwan'

MANILA, Philippines — Nakapagtala ng nasa 2,452 bagong kaso ng coronavirus disease (COVID-19) ngayong Huwebes ang Department of Health (DOH), bagay na nag-aakyat ng kabuuang bilang ng nahawaan sa Pilipinas sa 584,667.

Napirmi naman sa 37,226 ang kasalukuyang "active cases" ng sakit. Kumakatawan 'yan sa mga patuloy pa ring nagpapagaling mula sa COVID-19 infection.

Kauulat lang din ng Kagawaran ng Kalusugan ang pagkamatay ng bagong 15 pasyente, bagay na siyang nag-aakyat sa kabuuang local fatalities sa 12,404. Higit naman na mas marami diyan ang gumaling na mula sa virus, na siyang pumapatak na sa 535,037.

Anong bago ngayong araw?

• Nagpapagaling pa rin mula sa COVID-19 ang nasa 37,226 katao ngayon sa bansa. Ika-31 ng Oktubre noong huling beses na mas marami ang active cases sa bilang na 42,462.
• Kinumpirma naman ni presidential spokesperson Harry Roque na nasa eroplano na patungong Pilipinas ang nasa 487,200 doses ng AstraZeneca COVID-19 vaccines, bagay na tinatayang darating ngayong gabi.
• Minaliit ng DOH ang mga ulat na 10% lang ang efficacy rate o antas ng bisa ng AstraZeneca vaccine laban sa COVID-19 variant na unang nadiskubre sa South Africa. Sabi ni Health Undersecretary Maria Rosario Vergeire, wala pang 2,000 ang mga sinuri ng pag-aaral na ito habang hindi pa rin peer-reviewed.
• Pumalo naman na sa 8,559 katao ang natuturuan ng COVID-19 vaccine na likha ng Chinese manufacturer na Sinovac sa nakaraang tatlong araw, pagbabahagi ni Cabinet Secretary Karlo Nograles kanina
• Dagdag pa ni Nograles, tinitignan ngayon ng gobyerno kung pwedeng ibaba sa pinakamaluwag na modified general community quarantine (MGCQ) ang buong Pilipinas pagpasok ng ikalawang kwarto ng 2021.
• Umaabot na sa 114.42 milyon ang tinatamaan ng COVID-19 sa buong mundo, ayon sa huling ulat ng World Health Organization (WHO). Sa bilang na 'yan, 2.54 milyon na ang patay. 

— James Relativo at may mga ulat mula kina Xave Gregorio, The STAR/Alexis Romero at ONE News