Health Secretary Duque nagturok ng bakuna pero hindi nagpaturok
MANILA, Philippines — Mismong si Department of Health (DOH) Secretary Francisco Duque III ang nangasiwa sa pagtuturok sa unang recipient ng Sinovac COVID-19 vaccine sa Lung Center of the Philippines kahapon ng umaga sa opisyal na pag-uumpisa ng ‘vaccination program’ ng pamahalaan.
Siya rin mismo ang nagturok kay Dra. Eileen Aniceto, pulmonologist at head ng LCP emergency room na sinundan ng nasa 19 pang ibang health workers ng naturang pagamutan.
Sa kabila ng anunsyo na magpapabakuna rin si Duque, hindi naman ito naisagawa dahil sa mas inuna muna ang mga nakalinyang mga doktor at staff ng ospital.
Bago ito, muling hinikayat ng kalihim ang publiko na magpabakuna na at huwag nang hintayin ang pagdating ng ibang brand ng COVID-19 vaccine. Iginiit niya na sa buong mundo ginagamit ang Sinovac vaccine kung saan may 2.5 milyong doses na ang naiturok sa iba’t- ibang bansa.
Sinabi pa niya na aabot lamang sa .0005% ang risk o panganib na maaaring idulot ng bakuna habang kung hindi magpapabakuna ay napakataas ng risk na magkaroon ng COVID-19.
Tiniyak rin niya na may indemnification ang gobyerno sa mga magpapabakuna na magkakaroon ng seryosong epekto. Sinabi niya na sasagutin ng pamahalaan sa pamamagitan ng PhilHealth ang pagpapaospital ng pasyente at iba pang gastusin.
Bukod kay Duque, kasama rin niya sa programa sina Quezon City Mayor Joy Belmonte at Metropolitan Manila Development Authority (MMDA) General Manager Jojo Garcia.
- Latest