Metro Manila, 9 pang lugar GCQ pa rin sa Marso – Palasyo
MANILA, Philippines — Mananatili pa rin sa general community quarantine (GCQ) sa Metro Manila at siyam pang lugar sa buong buwan ng Marso.
Inihayag ito ni presidential spokesperson Harry Roque na bukod sa Metro Manila, iiral ang GCQ sa Apayao, Baguio City, Kalinga, Mt. Province, Batangas, Tacloban City, Iligan City, Davao City, at Lanao del Sur.
Maliban sa mga nabanggit na lugar, iiral sa buong bansa ang mas maluwag na modified general community quarantine (MGCQ).
Nauna rito, hindi kinatigan ni Pangulong Rodrigo Duterte ang panukala na ilagay na sa MGCQ ang buong Pilipinas.
Nanindigan ang Pangulo na kailangang magsimula muna ang pagbabakuna laban sa COVID-19 bago ilagay ang buong bansa sa mas maluwag na MGCQ upang matiyak na mapapabagal ang pagkalat ng impeksiyon.
Matatandaan na inihayag ni Roque na bagaman at kinikilala ng Pangulo ang kahalagahan nang pagbubukas na ang ekonomiya, upang mabawasan ang walang trabaho at mga nagugutom, pero mas matimbang sa kanya ang kaligtasan at kalusugan ng mga mamamayan.
Unang inilagay ng Metro Manila sa lockdown noong Marso 17, 2020 o halos isang taon na ang nakakaraan.
- Latest