Pagluwag ng restrictions, dahilan sa paglobo ng COVID-19
MANILA, Philippines — Ang pagbabawas sa ilang quarantine restrictions at ang maluwag naman na pagtugon ng mga lokal na pamahalaan ang maaaring nag-ambag sa dahilan upang muling umangat na ang mga kaso ng COVID-19 sa bansa.
Sinabi ni Health Undersecretary at spokesperson Ma.Rosario Vergeire nitong Sabado sa Laging Handa public briefing.
“Nakikita natin na may iba’t -ibang factors that may have caused this increase in the number of cases.”
“Unang-una na rin po ‘yung easing of restrictions at nakikita natin na medyo hindi po nasusunod ‘yung pag-comply natin sa minimum public health standards. Isa pang nakikita nating factor would be the response of our local governments. Kailangan lang pag-igtingin pa ang response lalong lalo na ang mga ginagawang quarantine and isolation protocols,” dagdag pa ni Vergeire.
Inihayag ito ni Vergeire kasunod ng pinakahuling tally ng COVID-19 cases nitong nakalipas na Biyernes na umabot na sa 571,327 habang ang mga bagong naitalang kaso ay nasa 2,651.
Ito aniya, ang pinakamataas na bilang ng COVID-19 infections na iniulat sa loob lamang ng isang araw para sa taong ito.
- Latest