Duterte sa Senado: ‘Gusto n’yo Pfizer, iorder ko kayo’
MANILA, Philippines — Binuweltahan ni Pangulong Rodrigo Duterte ang mga senador dahil sa umano’y pagpupumilit na bumili ang bansa ng bakuna kontra COVID-19 sa kumpanyang Pfizer.
Sa kanyang ulat sa bayan kamakalawa ng gabi, inihalimbawa ni Duterte ang 25 katao na namatay sa Norway matapos umanong mabakunahan ng gawa ng Pfizer, gayunman hindi pa rin malinaw kung ito ang sanhi ng pagkamatay doon.
“Ayan ‘yung sa Pfizer, gusto ninyong Pfizer, kayong mga senador, in Norway, 25 persons died after receiving Pfizer vaccination. Gusto ninyo? Mag-order kami para sa inyo,” ayon pa sa Pangulo.
Partikular na binatikos ni Duterte si Sen. Risa Hontiveros na paulit-ulit ang panawagan sa gobyerno na i-follow up ang emergency uses sa approval ng Food and Drug Administration para sa paggamit ng Pfizer.
Subalit sagot ni Senate President Vicente Sotto III, “Thanks but no thanks” sa alok ng Pangulo na magpapa-order siya ng COVID vaccine ng Pfizer na pinapaboran ng mga senador kaya binabanatan ang Sinovac.
Paliwanag ni Sotto, hindi pinapaboran ng Senado ang Pfizer o anumang bakuna at nabibigyan ng maling impormasyon ang Pangulo.
Sa kabila ng batikos ng Pangulo sa imbestigasyon ng Senado tungkol sa pagbili ng bakuna sa Sinovac ay tuloy na tuloy pa rin ang ikatlong pagdinig nila sa Biyernes.
Ayon pa kay Sotto, sa kanyang tantiya hindi sasang-ayon ang publiko sa pagtanggi ng gobyerno na isapubliko ang lahat ng tungkol sa COVID-19 vaccination roadmap nito.
Sa Biyernes ay pababalikin ng mga senador si vaccine czar Carlito Galvez Jr. at Health Secretary Francisco Duque III para tanungin kung magkano talaga ang presyo ng Sinovac.
- Latest