‘No VIP vaccination’ vs COVID-19 - Duque
MANILA, Philippines — Tiniyak ni Health Secretary Francisco Duque III na walang VIP treatment sa vaccination program laban sa COVID-19 at susundin ang nasa priority list ng pamahalaan.
Sinabi ito ni Duque matapos humingi ng kasiguruhan si ACT Teachers party-list Rep. France Castro na hindi na mauulit ang VIP vaccination na ang pinatutungkulan ay ang nangyaring pagbabakuna sa mga miyembro ng Presidential Security Group (PSG).
“Yes, madame chair, your honor. We will do our level best to ensure that the prioritization formula is followed. Sundan po natin ‘yung prioritization program,” wika ni Duque.
Noong Disyembre ay nag-isyu ang DOH ng listahan ng priority groups para sa bakuna.
Una sa listahan ang frontline health workers, senior citizens, indigent Filipinos, at uniformed personnel.
Kasunod nito ay inanunsiyo ng Pangulo na ilang sundalo ang nakatanggap na ng bakuna mula sa Sinopharm vaccine ng China.
Magugunita na inamin ni Defense Secretary Delfin Lorenzana na mga smuggled ang itinurok na bakuna sa PSG na mga close-in security escorts ni Pangulong Duterte.
Patuloy namang iniimbestigahan ng Food and Drug Administration, Bureau of Customs at National Bureau of Investigation ang nangyaring pagbabakuna sa PSG na una ng ikinatwirang sila lamang ang nagturok sa kanilang mga sarili.
Samantala, sinabi ni Duque na kailangan ng pamahalaan ng 3rd party logistics providers para sa cold storage ng COVID-19 sa darating na Agosto.
Sa kasalukuyan, ang kanilang storage facilities ay kaya lamang mag-accommodate ng bakuna na darating sa bansa hanggang Hulyo.
- Latest
