Dialysis ng Pitmaster, ibababa na sa mga barangay

MANILA, Philippines — Hindi na poproblemahin pa ng mga taong may sakit sa bato at mula sa malalayong probinsiya at mga liblib na mga barangay kung saan sila kukuha ng pambayad para magpa-dialysis.

Nagpirmahan ng isang memorandum of agreement ang Department of the Interior and Local Government (DILG) at ang Pitmaster Foundation Inc. para sa isang kasunduan na ipagbibigay-alam ng DILG sa bawat barangay ang libreng dialysis treatment na handog ng nasabing foundation.

Ayon kay Pitmaster Foundation Executive Dir. Caroline Cruz, “ito po ay commitment ng aming grupo na tumulong sa mga kababayan natin na hindi kayang magpa-dialysis dahil sa kahirapan.”

“It is part of our social responsibility and at the same time our small contribution to the government in helping those who need medical care,” dagdag ni Atty. Cruz.

“Kami po ay nagpapasalamat ngayon pa lang sa Pitmaster sa tulong na ito para sa mga kababa­yan natin na mahihirap,” ayon naman kay DILG Undersecretary for Barangay Affairs Martin Diño.

Irerekomenda ng mga local government units ang mga magpapa-dialy­sis sa pinakamalapit na dialysis center sa kanilang lugar na kapartner ng Pitmaster.