Roque, Pacquiao iimbestigahan sa mass gathering
MANILA, Philippines — Hindi palalampasin ng Department of Interior and Local Government (DILG) ang napaulat na mass gathering nina Presidential Spokesman Harry Roque at Sen. Manny Pacquiao.
Ayon kay DILG Sec.Eduardo Año, bubuo siya ng “fact-finding” investigation sa paglabag umano sa health protocol nina Sec. Roque at Sen. Pacquiao.
Ayon sa impormasyon ng DILG, nagresulta umano ang mga pagdalaw ng dalawang opisyal sa magkahiwalay na lugar ng malakihang pagtitipon ng mga tao at nabalewala na ang social distancing.
Nabatid na noong Biyernes ay guest si Roque sa isang okasyon sa Cebu dahil sa pagbubukas ng Bantayan Island Airport.
Sinasabing maraming tao ang dumalo sa okasyon at nalabag ang health protocol sa social distancing.
Kumalat naman sa social media ang litrato ni Sen. Pacquiao na nagsasalita sa harap ng maraming tao sa Batangas at hindi na rin nasunod ang social distancing.
“Umaapila tayo sa lahat, including government officials, kung meron kayong activities at hindi ninyo kayang ipatupad ‘yung health standards particularly, social distancing, stop it, huwag niyo nang ituloy ‘yan. You cannot just say sorry. Mahirap ‘yun,” sabi ni Año.
Sinabi naman ni Roque na welcome ang fact-finding investigation para makumpirma niya na bisita lang siya dito at pinaalalahanan niya ang mga tao na magsuot ng mask, hugas at iwas.
Sa inilabas ding pahayag ni Jake Joson, special assistant ni Pacquiao, welcome rin para sa senador ang imbestigasyon.
- Latest