COVID-19 vaccine darating sa Pinas bago 2nd quarter ng 2021
MANILA, Philippines — Pinapabilis na ng Food and Drug Administration (FDA) ang proseso ng pagbili ng mga bakuna na maaaring dumating sa bansa bago ang pagpasok ng ikalawang quarter ng taong 2021.
Sinabi ni FDA Director General Eric Domingo na inaasahan na magpapalabas na si Pangulong Rodrigo Duterte ng Executive Order (EO) para mag-isyu ng ‘emergency use authorization (EUA)’ para sa mga bakuna makaraang hilingin ng FDA.
Sa pamamagitan ng EUA, mapapaigsi ang proseso ng ebalwasyon ng bakuna at magbibigay-daan para kilalanin ng FDA ang ‘approval’ ng mga kahalintulad nilang ‘regulatory bodies’ ng ibang bansa katulad ng United States FDA.
Una nang sinabi ng pamahalaan na maaaring sa ikalawang quarter pa ng 2021 makakuha ng bakuna ang Pilipinas buhat sa mga debeloper.
“Once makakuha sila (vaccine developers) ng EUA for example sa US FDA, mas mapapabilis talaga ‘yung proseso,” giit ni Domingo.
Ito ay makaraan naman na ihayag ng Pfizer, Moderna, at Russia sa pamamagitan ng kanilang Sputnik V ang pagiging epektibo ng kanilang mga bakuna na lagpas 90 porsyento na ang “efficacy”.
- Latest
