COVID-19 necklace air purifiers ‘di iniendorso ng DOH
MANILA, Philippines — Mariing nilinaw kahapon ng Department of Health (DOH) na hindi nila inirerekomenda ang paggamit ng necklace air purifiers bilang proteksyon laban sa COVID-19.
Kaugnay ito sa lumabas na ulat na okey o aprubado ng DOH ang paggamit ng mga necklace air purifiers.
Ayon sa DOH, bagamat hindi naman nakakasama sa kalusugan ang necklace air purifiers, hindi rin umano nila iniendorso o hinihikayat ang paggamit ng mga ito.
Paliwanag ng DOH, hindi pa naman napapatunayan ang bisa ng mga naturang produkto laban sa virus o bacteria.
Binigyang-diin pa ng DOH na hindi rin maaring gamitin pamalit ang necklace air purifiers sa mga health protocols na ipinaiiral ng pamahalaan.
Pinakamabisa pa rin anilang paraan nang pag-iwas sa virus ang pagsusuot ng face shield at mask, regular na paghuhugas ng kamay at physical distancing.
Kasabay nito, pinayuhan din naman ng DOH ang publiko na sumunod sa mga bilin at abiso lang ng kagawaran, gayundin ng World Health Organization (WHO) at health institutions para sa mga tamang impormasyon.
- Latest