Philippine envoy sa Brazil pinauuwi, nanggulpi ng Pinay helper
Nahuli sa cam
MANILA, Philippines — Pinauuwi sa Pilipinas ang Philippine Ambassador to Brazil na si Marichu Mauro matapos na makunan sa CCTV ang panggugulpi niya sa kanyang Filipina helper.
Ayon kay DFA Secretary Teodoro Locsin Jr., nire-recall niya si Mauro habang gumugulong ang imbestigasyon sa kaniyang pambubugbog sa 51-anyos na kasambahay.
“The Philippine Ambassador to Brazil has been recalled effective immediately to explain the maltreatment of her service staff,” sabi ni Locsin.
Nakuhanan umano ng security camera si Mauro na sinasabunutan, hinahampas, pinapalo ng payong, at pinipingot ang kaniyang household helper sa mga video sa loob ng kaniyang diplomatic residence.
Ang pagmamaltrato na nakunan ng security cam ay ibinahagi ng isang empleyado subalit tumangging magpakilala.
Kabilang umano sa pananakit na ginagawa ni Mauro ay ang pananampal sa biktima at tumigil lamang nang may dumating pa na isang empleyado sa bahay.
Habang sa isang video ay hinihila ng ambassador ang tenga ng kasambahay at pinapalo rin ng payong.
Taong 2018 nang madestino si Mauro sa Brazil, at nasa ilalim niya rin ang Colombia, Guyana, Suriname, at Venezuela.
- Latest
