Go sa PhilHealth: Bayaran ang utang sa Red Cross!
MANILA, Philippines — Kinalampag ni Senator Christopher “Bong” Go ang Philippine Health Insurance Corp. (PhilHealth) na bayaran nito ang mga obligasyon o pagkakautang sa Philippine Red Cross.
Sinabi ni Go na ang nasabing usapin ay patunay kung gaano karesponsable sa paghawak ng pampublikong pondo ang ahensiya.
“Paalala ko lang po: Hindi dapat maapektuhan ang testing capacity natin. Hindi natin gusto na madagdagan pa ang pinapasan ng mga kababayan nating kailangang gumastos para sa COVID-19 testing, katulad ng mga OFWs, returning individuals, medical frontliners at iba pa,” ayon kay Go.
Ayon sa senador, kinakailangang makipagtulungan ang PhilHealth sa Red Cross para mabayaran na ang dapat na mabayaran alinsunod sa kung ano ang naaayon sa batas.
Bilang tagapangulo ng Senate committee on health, inalok ng senador ang sarili upang maging tagapamagitan sa concerned parties para maresolba na ang isyu.
Kinilala ni Sen. Go ang Red Cross na napakalaking tulong lalo ngayong panahon ng pandemya kaya napakahirap kung ito ay naiipit dahil hindi nababayaran ng gobyerno.
- Latest
