Pagpapalit ng liderato sa Kamara ‘di napapanahon ngayong may pandemya

MANILA, Philippines — Hindi na tama na magpalit ng Speaker sa gitna ng COVID-19 pandemic.

Sinabi ni Sagip Party-list Rep. Dante Marcoleta na ang naunang “gentleman’s agreement” sa pagitan nina House Speaker Alan Peter Cayetano at Marinduque Rep. Lord Allan Velasco ay nabuo nang hindi naman inaakalang may mangyayaring Covid-19 pandemic.

“Leadership is not about competing or ‘wai-ting our turn at the right time. The last six months dictated the most critical path of our national life. In Congress, we needed everyone to rally behind the Speaker in enacting the crucial pieces of legislation that will secure our survival as a people,” paliwanag pa ni Marcoleta.

Ang hindi rin umano pagsunod sa “gentleman’s agreement” ay hindi maikokonsiderang “test of leadership”.

Iginiit pa ng kongresista ang kasabihan na mahirap magpalit ng kapitan sa gitna ng umaalimpuyong bagyo at naniniwalang sa ibang panahon ang bituin ni Velasco ay magnining­ning din dahil bata pa naman siya.

Sinabi naman ni Laguna Rep. Danilo Fernandez at Deputy Speaker Lray Villafuerte na bagama’t gagalangin nila ang term sharing ay mas maraming kongresista ang nagnanais na huwag magpalit ng House Speaker.

Para kay Caloocan City Rep. Egay Erice ng Liberal Party, dapat na kanselahin ang term-sha-ring agreement dahil sa COVID-19 pandemic.

Ayon naman kay da-ting Speaker at Davao del Norte 1st District Rep. Pantaleon Alvarez, hindi siya kumbinsido sa term sharing deal dahil lilikha lamang ito ng pagkakahati-hati ng mga mambabatas kung saan iginiit na dapat tapusin na lamang ni Cayetano ang serbisyo nito sa buong 18th Congress.