PhilHealth scam noong nakaraang admin kalkalin din
MANILA, Philippines — Nais ni ACT-CIS Cong. Eric Go Yap na kalkalin din at simulan ang imbestigasyon ng korapsyon sa loob ng PhilHealth noong nakaraang administrasyon ni dating Pangulong Noynoy Aquino.
Ayon kay Cong. Yap, una na ring nabunyag at lumutang ang milyun-milyong kinurakot na pondo mula sa PhilHealth noong panahon ni PNoy, kabilang na ang malaking suweldo at allowance ng mga opisyal tulad ni Sen. Risa Hontiveros na noon ay Board of Director ng PhilHealth.
“Wala namang nangyari at walang nakulong na opisyal kaya patuloy ang nakawan sa pondo ng PhilHealth na kontribusyon ng mamamayan,” ani Yap.
Sinabi ni Yap, hangga’t walang nakukulong na mataas na opisyal ng PhilHealth ay hindi titigil ang pagnanakaw sa perang pinaghirapan ng bawat miyembro ng nasabing tanggapan.
Si Yap na Chairman ng Committee on Appropriations ay nagsabing naglalabasan ang korapsyon ngayon sa PhilHealth dahil may lakas ng loob na magsalita ang ilang matitinong empleyado at opisyal sa loob ng ahensiya sa ilalim ng administrasyon ni Pangulong Rodrigo Duterte.
Aniya, marapat lamang na makulong at walang sisinuhin ang mga taong responsable sa pandarambong sa pondo ng pamahalaan.
- Latest