Task Force target din ang BoC, corrupt agencies - Go
MANILA, Philippines — Inihayag ni Sen. Bong Go na hindi lang magpopokus sa PhilHealth ang lilikhaing “Task Force” kundi maging sa lahat ng ahensiya ng pamahalaan na nakalubog o may nakasistema nang katiwalian, kagaya ng Bureau of Customs.
“Hindi lang naman po PhilHealth ang may problema, alam natin na may iba pang mga ahensya diyan na kailangang gamutin para tuluyang matanggal ang corruption sa kanilang sistema. Halimbawa nito ay ang customs,” ayon kay Go.
Sinabi ng senador na hindi titigil si Pangulong Duterte na labanan ang corruption kaya mabilis na tinutugunan ng Chief Executive ang hinaing ng taumbayan at ang panawagang magkaroon ng isang Task Force na may kakayahang linisin ang mga ahensyang laganap ang anomalya at panagutin ang mga mapatunayang may sala.
Umaasa siya na sa paglabas ng kautusan ng Pangulo, ang Task Force sa pangunguna ng DOJ, kasama ang Ombudsman, COA, CSC, OES, at sa tulong din ng PACC — ay gagawin ang lahat upang matuldukan na ang mga problema sa PhilHealth.
Si Go ang nagrekomenda kay Pangulong Duterte na ikonsidera ang paglikha ng Task Force na magsisiyasat sa mga katiwalian sa PhilHealth.
Sinabi ni Go na pagkatapos na “talupan” ang mga anomalya sa PhilHealth, isusunod nito ang mga ahensiya na talamak o nakasistema na ang kurakutan kagaya sa hanay ng mga opisyal at tauhan ng Customs.
- Latest