Public transpo suspendido uli sa Metro Manila, 4 pang probinsiya
MANILA, Philippines — Tigil muna ang biyahe ng mga pampublikong sasakyan kabilang na ang mga rail lines simula ngayong araw hanggang sa Agosto 18.
Bunsod na rin ito nang muling pagpapairal ng pamahalaan ng modified enhanced community quarantine (MECQ) sa Metro Manila at ilang kalapit nitong mga lalawigan.
Ayon sa DOTr, kabilang sa mga lugar na wala munang public transportation ang National Capital Region (NCR), Bulacan, Cavite, Laguna at Rizal at tanging ang mga public shuttle para sa frontline workers ang papayagang bumiyahe.
Ititigil din muna ang pagbiyahe ng mga bus, jeep, taxi, TNVS, at mga tren ng LRT-1, LRT-2, gayundin ang MRT-3 at Philippine National Railways. Maging ang biyahe ng mga tricycle ay bawal din muna.
Para naman sa private transport, ang mga company shuttle ay papayagang bumiyahe pero 50% ng capacity lamang dapat ang sakay.
Maaari ring bumiyahe ang mga pribadong sasakyan.
- Latest