Signal no. 1 itinaas sa ilang lugar sa Region II dahil sa bagyong 'Carina'

MANILA, Philippines — Matapos maging ganap na bagyo Lunes nang madaling araw, patuloy na nakararanas ng Tropical Cyclone Wind Signal no. 1 dulot ng bagyong "Carina" ang ilang bayan at probinsya ng Cagayan Valley.

Namataan ang mata ng Tropical Depression Carina 275 kilometro silangan ng Tuguegarao City, Cagayan bandang 7 a.m. at may dalang hanging aabot sa 45 kilometro kada oras at bugsong aabot nang 55 kilometro kada oras.

Kasalukuyan itong kumikilos pa-kanluran sa bilis na 20 kilometro kada oras.

Kaugnay niyan, ang mga sumusunod ay isinailalim muna sa Signal no. 1 (makararanas ng mga hanging mula 30-30 kilometro kada oras sa loob ng 36 oras):

• Batanes
• Babuyan Islands
• hilagangsilangang bahagi ng mainland Cagayan (Santa Ana, Gonzaga, Santa Teresita, Buguey, eastern Lal-lo, eastern Gattaran, and eastern Baggao)

"The center of Tropical Depression 'CARINA' is forecast to turn northwestward and move over the Luzon Strait, passing close to the northeastern portion of Cagayan and Babuyan Islands between tonight and tomorrow morning," ayon sa weather bulletin ng PAGASA.

"However, accounting for the forecast track probability cone, a landfall scenario over these areas remains a possibility."

Ayon kay Ariel Rojas, weather specialist ng PAGASA, ganap na naging tropical depression ang bagyong Carina bandang 2 a.m.

Sa kabila nito, tinatayang hihina ito uli hanggang sa maging low pressure area pagsapit ng Miyerkules.

Malalakas na ulan, hangin

Katamtaman hanggang malalakas na pag-ulan ang naghihintay ngayong araw sa Babuyan Islands at silangang bahagi ng mainland Cagayan at Isabela.

Mahihina hanggang katamtaman na may minsanang malalakas na pagbuhos naman ang maaaring matikman sa Rehiyon ng Ilocos, Cordillera Administrative Region, nalalabing bahagi ng Aurora at hilagang parte ng Quezon kasama ang Polilio Islands.

"Flooding and rain-induced landslides may occur during heavy or prolonged rainfall especially in areas that are highly or very highly susceptible to these hazards," dagdag pa ng PAGASA.

Posible ring makaranas ng mga malalakas na hangin ang mga lugar na nasa ilalim ng TCWS no. 1, bagay na magdudulot ng matataas na alon.

"Moderate to rough seas (1.2-3.1 m) will be experienced over the northern and eastern seaboards of Luzon in the next 24 hours. Those with small seacrafts are advised not to venture out to sea," sabi pa ng ahensya. — James Relativo