Walang face mask pagdadamputin!
MANILA, Philippines — Iminungkahi ni Foreign Affairs Secretary Teodoro Locsin Jr., sa Inter-Angency Task Force (IATF) na arestuhin ang mga taong walang suot na face mask at ilagay sila sa isang malaking bakanteng lugar tulad ng parking lots para magtanda.
Ito ang tugon ni Locsin sa tweet ng mamamahayag at siklistang si Howie Severino na inaresto sa Quezon City noong Miyerkules matapos na makita ng isang enforcer na walang mask dahil umiinom ng tubig.
Ayon sa kalihim, kung hindi paparusahan ang mga taong lumalabag ay manganganib ang lahat at ang ekonomiya ng bansa ay mamamatay.
“But if we don’t punish to teach we will never risk opening up and the economy will die. Dictatorship will be unavoidable,” sabi pa ni Locsin.
Wika pa ng kalihim na kanyang imumungkahi sa IATF na ilagay sa isang bakanteng lugar tulad ng parking lots ang mga sumusuway at hindi nagsusuot ng face mask para magkaroon ng social distancing.
Magugunitang umabot sa 874 offenders ang nahuli ng pinagsanib na puwersa ng QC government at QC Police nang isagawa ang sorpresang “one-time big-time” laban sa mga taong hindi nagsusuot ng face mask habang nasa labas ng kanilang mga tahanan.
- Latest
