Mga bumalangkas ng 1987 Constitution tutol sa Anti-Terrorism Law

MANILA, Philippines — Sumama na sa lumalaking bilang ng mga tumututol sa Anti-Terrorism Law ang ilang framers ng 1987 Constitution, habang sinasabing ibinabalik nito ang bansa sa estilo ng diktadura noong dekada '70.

Sa isang pahayag na nilagdaan nina Felicitas Arroyo, Teodoro Bacani, Florangel Rosario Braid, Edmundo Garcia, Jose Luis Gascon, Christian Monsod at Bernardo Villegas, sinabi nilang dapat "umabante" at hindi "umatras" ang bansa.

"The Charter was drafted and popularly approved in a plebiscite in the aftermath of one of the darkest chapters in our history when the rule of law was violated with impunity," sabi nila.

Basahin: Ano ang 'Anti-Terror Bill' at bakit may mga tutol dito?

Sa kasalukuyang Saligang Batas, limitado ang ibinibigay na "extraordinary powers" sa estado bilang proteksyon sa pang-aabuso, habang tinatanggal na rin ang Arrest, Search and Seizure Orders (ASSO) noong martial law, na ginamit noon ni dating Pangulong Ferdinand Marcos Sr. para ipadampot ang mga kritiko ng diktadura.

Pero dahil sa mga kapangyarihang iginagawad ng Republic Act 11479 sa Anti-Terrorism Council (ATC), maaaring masaksihan daw ng Pilipinas ang pagbabalik ng mga "'di kaaya-ayang karanasan," sabi ng mga framers.

Sa Anti-Terrorism Act of 2020, may kapangyarihan ang ATC — na binubuo ng ilan sa Gabinete na may kasaysayan ng red-tagging — para ideklara bilang terorista ang isang grupo o indibidwal.

Mabibigyang otoridad din nito ang mga pulis na magkulong nang hanggang 24 araw nang walang kaso sa korte. Bukod diyan, hindi rin daw nabibigyan ng batas ng pagkakataon ang akusado na depensahan ang sarili sa isang pagdinig.

"Those who differ will be branded as recalcitrants and their silencing would have a deceptive justification," saad pa nila.

"This law precisely creates a climate of fear, sends a chilling effect, on those who wish to express their legitimate grievances, state their aspirations, and wish to engage in open and democratic debate, and threatens the rights of associations who may wish to dissent and question the actuations of those in power."

May kaugnayan: Korte Suprema inulan ng petisyon vs anti-terror law ng mga propesor, grupo

Una nang kinastigo ni noo'y Supreme Court Senior Associate Justice Antonio Carpio ang Anti-Terrorism Law at tinawag itong "mas malala sa martial law."

Pagbalik ng awtoritaryanismo?

Pero hindi nagtapos ang panig ng framers diyan, at direktang tinawag na paurong ang batas pabalik sa awtoritaryanismo.

"The Anti-Terrorism Act gives unprecedented powers to the administration. And we may already be on a slippery slope to authoritarianism," sabi pa nila.

Sa kasaysayan din daw, natutunan nila na nagluluwal ng mga "little dictators" sa kanya-kanyang mga local government units ang diktadurya, bagay na sinasalag at natitikman mismo ng mga mahihirap.

Naipasa ang anti-terrorism measure kasabay ng nararanasang coronavirus disease (COVID-19) pandemic ng mundo, panahong meron daw "mahihinang" sistema ng checks and balances at "pangit" na record ng accountability sa pagpapatupad ng mga batas.

"We, Framers believe that we do not need another law against terrorism at this time when in fact we have sufficient laws that can thwart terrorists and acts of terrorism," kanila pang paliwanag. — James Relativo at may mga ulat mula kay Kristine Joy Patag