Locsin pinagmumura pasimuno ng 'jeepney phaseout'; tsuper balik-pasada na
MANILA, Philippines — Nanggalaiti si Foreign Affairs Secretary Teodoro Locsin Jr. sa mga maniobra para tuluyang tanggalin ang mga "hari ng kalsada" sa pamamasada, kahit na miyembro siya mismo ng Gabinete ni Pangulong Rodrigo Duterte.
'Yan ang kanyang sinabi kasabay ng pagbabalik-pasada ng mga tradisyunal na jeepney sa National Capital Region matapos suspindihin nang halos apat na buwan bilang pag-iingat laban sa pagkalat ng coronavirus disease (COVID-19).
Basahin: Ilang 'roadworthy' na traditional jeeps sa NCR balik-pasada sa Biyernes
May kaugnayan: 6,002 NCR jeeps babalik bukas, malayo sa kabuuang 74,000 — PISTON
"Shame on all who want to drive jeepney drivers deeper into their extreme poverty and abolish the only genuine symbol of our race," sabi ng kalihim sa Twitter, Biyernes nang umaga.
"P*****ina niyo lahat . Walang awa. Walang hiya."
Shame on all who want to drive jeepney drivers deeper into their extreme poverty and abolish the only genewwine symbol of our race. Putangina niyo lahat . Walang awa. Walang hiya. https://t.co/Ku3ZpUa6s0
— Teddy Locsin Jr. (@teddyboylocsin) July 3, 2020
Ilang beses nang sinasabi ng ilang jeepney groups na maaaring ginagamit ng gobyerno ang COVID-19 pandemic upang lalong pabilisin ang pagtatanggal ng mga tradisyunal na jeepney sa Pilipinas, para palitan ng mga "modernong" jeep na pinatatakbo ng kuryente o Euro 4 compliant disel engine.
Gayunpaman, iprinoprotesta nang maraming jeepney driver's associations at grupo gaya ng PISTON ang jeepney phaseout sa dahilang napakamahal aniya ng mga unit na hindikaya ng mga operator bilhin.
Basahin: No stopping jeepney phaseout — DOTr chief
Giit ng Department of Transportation (DOTr) noong 2019, ligtas, "convenient" at mas maigi sa kapaligiran ang mga modernong jeep.
Kahapon lang nang sabihin ng Land Transportation Franchising and Regulatory Board (LTFRB) chairperson Martin Delgra III na posibleng hanggang Disyembre 2020 na lang ang mga tradisyunal na jeep sa kalsada, maliban kung magkokonsolida ang sari-saring grupo sa iisang kooperatiba o korporasyon at mabibigyan ng provisional authority.
"After consolidation po, 'yun na po 'yung pagpapalit ng unit," ani Delgra.
"We have actually extended the deadline from June 30, dahil nga po sa COVID-19, to December 31. Ano pong mangyayari pagdating sa December 31? Their franchise will expire unless they will file a provisional authority."
Ang sinasabing provisional authority na ibibigay ay magiging epektibo sa loob ng isang taon.
Tinatayang nasa 6,002 ang mga jeep sa Metro Manila na babalik sa kalsada ngayong araw — malayo sa kabuuang 74,000 units ayon sa grupong PISTON.
"[L]ubhang napakaliit nito kumpara sa tunay na bilang ng mga jeepney sa Metro Manila. Mananatiling gutom ang maraming drayber at opereytor," ani Floranda.
"Reta-retasong ruta lamang ang ibinibigay ng LTFRB sa mga drayber at opereytor."
TIGNAN: Handa na sa Balik-Pasada ang byaheng Quezon Ave-Sta Mesa! Patuloy pa rin ang panawagan natin na ibalik ang lahat ng ruta! 100% Balik-Pasada, Zero Phaseout, ngayon na!#BalikPasadangLigtas#NoToPUVPhaseout pic.twitter.com/yxBCfWFWz8
— PISTON (@pistonph) July 2, 2020
Dahil diyan, tinatayang nasa 68,000 jeepney units pa rin ang pagbabawalang bumiyahe sa Kamaynilaan. Una nang umabot sa 17.7% ang unemployment rate sa Pilipinas noong Abril 2020 dahil sa epekto ng mga lockdown, na nagsara sa operasyon ng maraming negosyo at pampublikong transportasyon.
Ang mga nasabing unit ay dadaan sa 49 ruta at maaari lamang magsakay hanggang sa 50% ng capasity ng sasakyan. Dapat din na "roadworthy" ang mga ito at kinakailangang asikasuhin ang contact tracing efforts at tamang physical distancing sa pagitan ng mga pasahero.
- Latest