OFWs na nasawi sa COVID, iki-cremate agad
MANILA, Philippines — Agad na isasailalim sa cremation ang mga labi ng mga overseas Filipino workers na nasawi dahil sa COVID-19 sa oras na maiuwi sa Pilipinas buhat sa Saudi Arabia.
Sinabi ni Health Undersecretary Maria Rosario Vergeire na ipinagbabawal ang cremation sa Kingdom of Saudi Arabia ngunit sa polisiya ng bansa ay kailangan na mai-cremate ang mga bangkay sa loob ng 12 oras.
Tinatayang nasa 301 bangkay na nasawi sa Saudi ang nakatakdang ipa-repatriate sa Pilipinas bago matapos ang palugit na Hulyo 4. Sa naturang bilang, 145 ang nasawi sa COVID-19.
“Tayo po ay nagbigay na ng abiso na kailangan completely sealed ang casket. Pagdating dito immediate burial po agad dapat iyan, hindi na puwedeng buksan ang casket nila,” ani Vergeire.
Sa huling datos ng Department of Foreign Affairs (DFA), nasa 8,433 Filipino sa 59 bansa sa mundo ang tinamaan ng COVID, 2,814 ang aktibong kaso, 5,081 ang nakarekober habang nasa 538 ang nasawi.
- Latest