Free swab testing sa COVID lalarga na
MANILA, Philippines — Aprub na sa ikatlo at pinal na pagbasa ang panukalang batas sa free swab testing sa COVID-19 ng mga “vulnerable” na miyembro ng lipunan tulad ng mga senior citizen, buntis, frontliners at iba pa.
Sa botong 240 pabor ay pinagtibay ang House Bill 6865 o Crushing COVID-19 Act na inisponsoran ng 80 mambabatas.
Sandaling lagdaan ni Pangulong Rodrigo Duterte ay magbibigay ito ng libreng Polymerase Chain Reaction (PCR) testing sa mga pasyente at healthcare workers na may sintomas at wala pero may history ng travel at contact sa isang hinihinalang may COVID; non-health frontliners na nagresponde sa COVID; mga taong may co-morbidities o may mga sakit na mas madaling tamaan ng virus, holder ng quarantine passes na siyang lumalabas ng bahay para bumili ng pangangailangan ng kanilang pamilya at iba pa.
Sa mga non-health frontliners ay mga pulis, sundalo, bumbero, barangay health workers at officials, mga nagtatrabaho sa piitan, nagtatrabaho sa swabbing at testing workers.
Samantala, ang mga banyaga na dumarating sa bansa ay kailangang sumailalim din sa PCR test at ang gastusin dito ay dapat ng mga itong bayaran.
- Latest