Unom ka polis nadugang sa mga positibo sa COVID-19
CEBU, Philippines — Lain na usab unom ka polis sa Police Regional Office (PRO7) ang nagpositibo sa Novel Coronavirus kun COVID19 sumala pang PRO7 Director Police Brigadier General Albert Ferro. Ang unom pulos mga sakop sa Cebu City Police Office (CCPO) human nga nigawas na ang resulta sa ilang swab test.
Nagtuo si Ferro nga nakuha nila ang maong virus gikan sa ilang dinakpan ug nabilango sa ilang police station.
Sa miaging semana, sa Pardo Police Station dunay dinakpan silang positibo sa COVID-19. Wala hinuon ibutyag ni Ferro kun ang maong mga polis nga bag-ong natakboyan gikan sa maong presinto.
Si Ferro subling mipahinumdom sa tanan nga bisan General Community Quarantine (GCQ) na ang tibuok Central Visayas nagkataas pa gihapon ang kaso sa mga nataptan sa maong sakit.
Ang unom ka polis gidala na sa isolation facility, sagad kanila asymptomatic. Atol ning pagsuwat sa balita padayong giatiman ang panginahanglan sa maong mga polis.
“Naa sila diri sa downtown para ato silang tiwason ang ilang mga other medical needs if need to be kay asymptomatic man tanan but kagabii naay nag kalintura (hilanat) but recovering naman sya nawala na ang kalintura (hilanat). So, hopefully mag okay na siya then after several days kung makuha na nila ang 14 days they will be tested for the second swab then we will be able to determine kung diha na sila sa recovery center nato para continuing lang ang ilang therapy,” matud pa ni Ferro.
Gipasalig usab niya nga adunay 24/7 nga medical personnel gikan sa Regional Health Services (RHS7) nga nagatiman sa mga polis diha sa isolation facility ug sa recovery center sa mga frontliners.
Gipahibalo sab ni Ferro nga naka-recover na sa maong sakit ang 17 ka polis nga unang natakboyan sa virus human negatibo na ang resulta sa swab test nga gihimo kanila. /IBM (BANATNEWS)
- Latest
