DepEd pagpapaliwanagin ng Kamara
MANILA, Philippines — Dahil sa magkakaibang opinyon ng mga opisyal ng pamahalaan, pagpapaliwanagin ng Kamara ang Department of Education (DepEd) kung dapat pang ituloy o ipagpaliban muna ang pagbubukas ng klase sa darating na Agosto para sa school year 2020-2021.
Sinabi ni ACT-CIS Partylist Rep. Eric Go Yap, na maghahain siya ng resolusyon upang linawin ng DepEd kung ano talaga ang nararapat na gawin ng gobyerno para sa pagbubukas ng klase sa gitna na rin ng COVID-19 pandemic.
“Once and for all, ano ba talaga? Safe bang buksan ang klase sa Agosto o hindi? Nalilito ang publiko dahil sa magkakaibang pahayag. Kailangang makasiguro tayo at dapat tama ang aksyon natin dahil kapakanan at kaligtasan ng mga estudyante ang nakasalalay dito,” pahayag ni Yap.
Binigyang diin ng mambabatas na bilang mga opisyal ng DepEd ay dapat may sarili ang mga itong ‘stand’ sa isyu ng pagbubukas ng klase na dapat klaruhin sa publiko lalo na sa mga magulang ng mga apektadong estudyante.
Layunin din umano ng resolution at imbestigasyon na matukoy ang kahandaan ng mga ahensya ng pamahalaan sa pagpapatupad ng “new normal” sa mga paaralan, sakaling matuloy ang pagbubukas ng klase.
Una nang sinabi ni Pangulong Duterte na hindi siya payag na magsimula ang mga klase sa bansa hangga’t walang nadidiskubreng bakuna kontra sa virus na COVID 19. Gayunman, ayon naman kay Presidential Spokesman Harry Roque ay tuloy ang pagbubukas ng klase na itinakda sa Agosto 24.
Sa huli, iginiit ni Yap na basta masiguro ang kaligtasan ng mag-aaral ay yun ang irerekomenda nila para sa magiging desisyon ng pamahalaan sa pagbabalik eskuwela.
- Latest
