Bulacan nasa ilalim ng MECQ hanggang May 31
MANILA, Philippines — Inaprubahan ng National Inter-Agency Task Force on Emerging and Infectious Diseases (IATF-EID) ang kahilingan ni Bulacan Governor Daniel R. Fernando na isailalim muna sa Modified Enhanced Community Quarantine (MECQ) ang lalawigan hanggang May 31.
Nauna ng inaprubahan ng Regional IATF-EID na sa halip na extention ng Enhanced Community Quarantine (ECQ) ang lalawigan, isinama ito sa MECQ.
Ang unang kahilingan ni Gov. Fernando sa RIATF ay para sa extension ng ECQ sa lalawigan dahil nasa unang yugto pa lamang ng mass testing ang Bulacan na lubhang mahalaga upang lubusang masugpo ang pandemya.
Nauna rito, nakasama ang lalawigan ng Bulacan sa General Community Quarantine (GCQ) noong May 11. Noong May 13, naghain ng kahilingan si Fernando kasabay ang iba pang gobernador sa Central Luzon sa Regional at National IATF-EID na mabigyan sila ng extension upang manatili sa ECQ.
Kaugnay nito, matapos ang validation ng Regional at National IATF-EID, opisyal na ipinababatid na ang lalawigan ng Bulacan ay pinahihintulutan na malipat sa MECQ.
- Latest
