Philippine Arena tatanggap na ng COVID-19 patients sa susunod na linggo

MANILA, Philippines — Magsisimula nang maging operational ang coronavirus disease (COVID-19) quarantine facility ng Philippine Arena sa susunod na linggo, pagkukumpirma ni Presidential Adviser on the Peace Process Carlito Galvez Jr.

Ang Iglesia ni Cristo-owned na pasilidad, na pinakamalaking indoor arena sa mundo, ay nakatakdang gawing "mega quarantine faciity" para sa mga nakikipagbuno sa nakamamatay na virus.

Kaya nitong humawak ng 300 asymptomatic patients at mga kasong may mild at moderate symptoms mula Quezon City, Caloocan, Malabon, Valenzuela at Bulacan, ayon kay Galvez, na chief implementer din ng National Task Force (NTF) kontra COVID-19, 

Sabi ni Bases Conversion and Development Authority (BCDA) President at chief executive officer (CEO) na si Vince Dizon, maaari pang paunlarin ang kapasidad ng lugar para humawak ng 2,000 pasyente.

Una nang ininspeksyon nina Galvez, Dizon, Defense Secterary at NTF chair Delfine Lorenzana, at Department of Health Director for Health Emergency Management Bureau Gloria Balboa ang lugar.

Pero bago ito maging operational, dapat muna raw baguhin ang configuration ng arena dahil sa mga isyung pangkaligtasan.

"Dahil yung requirement ng DOH ang sinusunod natin, most probably ‘yung model natin sa Rizal Memorial ang gagamitin natin, so papalitan natin 'yung partition. Hindi pwede ang tela kasi kumakapit ang virus doon. Papalitan natin ng acetate," sabi ni Galvez.

Magkakaroon naman ng hiwalay na tirahan doon ang nasa 300 medical frontliners na magmamando sa quarantine area.

Matatandaang inanunsyo noon ni Cabinet Secretary Karlo Nograles na ico-convert din nila bilang quarantine facilities ang ilang barko, hotel at malalaking pasilidad gaya ng Philippine International Convention Center (PICC) at World Trade Center para sa mga patients under investigation (PUIs) at persons under monitoring (PUMs).

Umabot na sa 3,764 na bilang ng COVID-19 cases ang Pilipinas, habang 177 sa kanila ang namatay na, ayon sa huling ulat ng DOH, Martes. — may mga ulat mula kay Patricia Lourdes Viray