‘Mangungupit ng pera at relief goods ipakukulong ko’ – Duterte
MANILA, Philippines — Nagbabala si Pangulong Rodrigo Duterte na ipakukulong ang mga opisyal ng gobyerno na mangungupit ng pera at relief goods na para sa mga mamamayan na apektado ng enhanced community quarantine dahil sa novel coronavirus 2019 o COVID-19.
“Ngayon, sa mga tao na binigyan ng --- people tasked of distributing the money, distributing the food, distributing the relief goods, kindly do it...‘pag nagkamali kayo dito, hindi ko kayo palusutin,” sabi ng Pangulo.
Sinabi ng Pangulo na hindi siya malupit na tao pero ipakukulong niya ang mga gagawa ng katiwalian, hoarding at magdi-divert ng tulong sa mga hindi naman dapat tulungan.
“Sabi ko huwag ngayon. Huwag na huwag kayong mandaya, mangurakot at taguin ‘yung mga pagkain at ‘yung iba hindi bigyan kasi… You know, people sometimes think that they own whatever they receive from government. This is not yours, neither is it mine,” dagdag ng Pangulo.
Bukod sa ipakukulong, sususpendihin din ang mga mamumulitika at mga mangungurakot na mga opisyal.
Samantala, inianunsyo ni Cabinet Secretary Karlo Nograles na siya ring spokesman ng Inter-Agency Task Force on the Management of Emerging Infectious Diseases na may Technical Working Group (TWG) na magsasagawa ng kaukulang pag-aaral sa ipinaiiral na community quarantine sa Luzon.
Sinabi ni Nograles na pangungunahan ng Department of Health (DOH) ang TWG na siyang bubuo ng parameters o pamantayan kung kinakailangan pang magpatuloy o mapalawig ang community quarantine.
Ayon kay Nograles, pagkatapos na maisapinal ng TWG ang assessment ay agad itong ipiprisinta sa IATF.
Sa ngayon ay masyado pang maaga umano para sabihing kailangang palawigin o hindi na ang community quarantine dahil kailangang mapag-aralang mabuti.
- Latest