National Task Force vs ASF binuo ni Duterte
MANILA, Philippines — Bumuo na si Pangulong Rodrigo Duterte ng isang national task force para pigilan ang pagpasok ng mga animal-borne diseases gayundin para ma-contain at ma-control ang pagkalat nito sa bansa.
Nakapaloob ito sa Executive Order 105 na nilagdaan ng Pangulo nitong Pebrero 21 at epektibo agad.
Ito ay bunsod na rin ng pagkalat ng African swine fever (ASF) sa bansa na matindi na ang epekto sa hog industry.
Ang task force ang tututok sa implementasyon ng mga polisiya at bubuo sa mga strategies para masugpo ang pagkalat ng ASF.
Kinumpirma ng Department of Agriculture (DA) na ang “backyard” at commercial farms sa ilang lugar sa Luzon ay apektado na rin ng ASF virus at mahigit na sa 67,000 baboy ang pinatay sa pamamagitan ng culling para makontrol ang pagkalat ng nasabing sakit.
Ang National Task Force on Animal-Borne Diseases (NTFAD) ay pamumunuan ng kalihim ng Department of Agriculture (DA) habang vice chairperson ang kalihim ng Department of Health (DOH).
Makakasama sa task force ang executive secretary at mga kalihim ng DILG, DENR, DTI, DOF, DBM, DSWD, DFA, DOTr at Defense.
Manggagaling ang funding sa task force sa mga pondo ng member-agencies.
- Latest