LGUs tinaningan ng 90 araw vs The Big One
MANILA, Philippines — Binigyan kahapon ng 90 araw na palugit ni Interior and Local Government Secretary Eduardo Año ang mga Local Government Units para i-assess o inspeksyunin ang mga gusali at imprastraktura bilang paghahanda sa pagtama ng The Big One o 7.2 magnitude na malakas na lindol sa Metro Manila.
Ayon kay Año, ang mga opisyal ng mga pamahalaang lokal na hindi tatalima ay mahaharap sa kasong administratibo at kriminal na ang kaparusahan ay ‘dismissal’ o pagkakatanggal sa puwesto at hindi na maaaring tumakbo sa anumang posisyon sa gobyerno.
“This is more requiring the fast track of assessment,” anang opisyal sa pinangangambahang pagtama ng The Big One kapag gumalaw ang West Valley Fault line.
Kabilang sa mga maaapektuhan ay ang Greater Metro Manila Area (GMMA) na kinabibilangan ng Metro Manila, Pampanga, Bataan, Zambales, Nueva Ecija, Tarlac, Bulacan, Laguna, Cavite, Rizal, Batangas at Quezon.
Sa pagtaya naman ni Maria Antonia Bornas, hepe ng Volcano Monitoring and Eruption Division, mahigit 40,000 katao ang mamamatay, 34,000 dito ay sa Metro Manila at ang iba pa ay sa mga karatig lugar kapag tumama ang The Big One sa Greater Manila Area.
Nangako naman ang iba’t ibang ahensya ng pamahalaan na paiigtingin pa ang pagtugon sa Disaster Resilience and Preparedness program.
Inihayag naman ni DPWH Secretary Mark Villar na 5,980 gusali ang kasalukuyang sumasailalim sa ‘risk assessment’ sa Metro Manila, Cavite, Laguna, Batangas, Rizal at Quezon at maging sa Central Luzon. (Joy Cantos)
- Latest