Travel ban sa South Korea pinag-aaralan na
MANILA, Philippines — Pinag-aaralan na ng pamahalaan kung magpapatupad ng travel ban sa South Korea matapos itaas sa highest alert ang kaso ng COVID-19 sa naturang bansa.
Ayon kay Cabinet Secretary Karlo Nograles, krusiyal ang gagawing pagpupulong ngayong araw ng Inter-agency Task Force on Emerging Infectious Diseases para pag-usapan kung kailangan na bang isama ang South Korea sa travel ban dahil sa patuloy na pagdami ng nasabing sakit.
Mayroon nang 893 kaso ng COVID-19 sa South Korea matapos makapagtala ng panibagong 60 kaso sa nakalipas na magdamag.
“I think they are attributing it to a particular church in South Korea wherein there was one attendee who was apparently positive for COVID-19 and she infected a lot of churchgoers there,” ayon kay Nograles.
Dahil dito, pinayuhan ng Department of Health (DOH) ang mga Pinoy na iwasan munang magtungo o magbiyahe sa South Korea partikular sa Daegu City at Cheongdo na may mataas na bilang ng kaso ng COVID-19.
Pinayuhan din ang mga Pinoy na masusing bantayan ang sitwasyon sa South Korea bago magpasyang bumiyahe roon.
Samantala, muling nanawagan si Health Sec. Francisco Duque III sa publiko na huwag nang gumamit ng face mask kung wala namang sakit.
Ang mas mahalaga aniya ay palakasin ang immune system at pananatili ng kalinisan sa katawan.
“Basta maghugas ka na lang ng kamay mo. 20 seconds. Mas madalas, mas maigi. O kaya magpunas ng alcohol. Magbaon ng panyo, panangga sa pagsinga, bahing at ubo para ‘di ka makahawa. At kung meron ka namang sakit, manatili ka na lang sa tahanan mo at mag-mask ka,” dagdag ni Duque.
- Latest
