Cha-cha isinantabi muna ng Kamara

MANILA, Philippines — Isinantabi muna ng Kamara ang hakbang para sa pag-amyenda sa 1987 Constitution.

Ayon kay House Speaker Alan Peter Ca­yetano, mas maraming mahahalagang usapin na dapat bigyang atensyon ng mga mambabatas tulad ng pagtalakay sa banta ng coronavirus, termination ng Visiting Forces Agreement (VFA) at ang renewal sa franchise ng ABS-CBN.

Matatandaan na hindi natuloy ang botohan sana nitong Miyerkules ng House Committee on Constitutional Amendment para sa charter change o Cha-cha bagamat nauna nang sinabi ng chairman ng komite na si Cayagan de Oro Rep. Rufus Rodriguez na pagbobotohan na ito.

Paliwanag ni Caye­tano, pinostpone nila ito dahil sa maraming kontrobersya na sabay-sabay at mahirap na magkaroon sila ng malamig na diskusyon gayung sabay-sabay ang mainit na usapin.

Idinagdag pa ni Speaker na sa pamamagitan ng pag-postponed nila sa botohan ay magbibigay din ito ng panahon kung paano tatanggapin ang Cha-cha ng mga kongresista.

Nais din umano niya na magsagawa ng consensus at hikayatin ang mga kongresista sa halip na i-pressure ang mga miyembro ng Kamara lalo na ang mga batang kongresista.