Duterte may pinakain ng P300 – Go
MANILA, Philippines — Isiniwalat kahapon ni Senator Christopher “Bong” Go na may pinakain ng pera si Pangulong Rodrigo Duterte noong isang linggo na nagkakahalaga ng P300.
Sinabi ito ni Go bilang babala sa mga opisyal at empleyado ng Bureau of Immigration na posibleng sangkot sa sinasabing “pastillas” modus.
“Maniwala kayo o sa hindi, ipapakain sa inyo yang pastillas na yan pero ang palaman hindi polboron ang palaman pera. Noong isang linggo lang may pinakain si Pangulo...P300 nilunok nya,” ayon kay Go.
Nilinaw naman ni Go na hindi opisyal ng gobyerno ang pinakain ng pera kundi isang manloloko at manggagamit ng pangalan.
Nagbiro pa si Go na tiyak na mababawasan ang nilunok na P300 kaya magiging barya na ito pag lumabas.
“Sabi ng Pangulo, ‘mahilig ka sa pera ngayon kainin mo ang pera’ di kinain nya ng buo ang problema yung P300 pagbawas nyan barya na,” sabi ni Go.
Ayon pa kay Go, iniimbestigahan na ng National Bureau of Investigation (NBI) ang isiniwalat na ‘pastillas’ modus ni Sen. Risa Hontiveros kung saan nagbabayad umano ng P10,000 service fee ang bawat Chinese na gustong pumasok sa bansa.
Ipinaalala ni Go na sila ang tumulong noong 2016 para mabigyan ng dagdag na sahod ang mga taga-immigration dahil gusto ni Duterte na mawala ang korapsiyon.
- Latest