Caballo Island, Fort Magsaysay gagawing quarantine area ng OFWs mula Wuhan
MANILA, Philippines — Ikinokonsidera na gawing ‘quarantine area’ para sa mga overseas Filipino workers na nais bumalik sa bansa galing Wuhan, China ang Caballo Island at Fort Magsaysay Rehabilitation Center sa Nueva Ecija kaugnay na rin ng pangamba laban sa nakamamatay na 2019 novel-coronavirus (nCoV).
Inihayag ito ni Defense Secretary Delfin Lorenzana kaugnay ng pamimili ng Department of Health (DOH) ng mga alternatibong lugar para gawing quarantine area sa mga OFWs galing Wuhan.
Sabi ni Lorenzana, bumisita na sa Caballo Island ang mga opisyal ng DOH nitong Biyernes at nitong Sabado ay isinunod namang inspeksyunin ang Fort Magsaysay sa Palayan City, Nueva Ecija.
Ang Caballo Island ay malapit lamang sa Corregidor gayundin sa Manila Bay habang ang Fort Magsaysay sa Palayan City ang himpilan ng Army’s 7th Infantry Division (ID) sa Central Luzon na may malawak ring pasilidad.
Sa tala ng Department of Foreign Affairs (DFA), tinatayang nasa 150 ang mga OFWs sa Wuhan na karamihan ay mga English teacher na nais nang umuwi sa Pilipinas sa takot na mahawa sa coronavirus doon.
Ang Wuhan ay nasa ilalim ng lockdown dahil dito nagmula ang coronavirus na nakuha sa paniki.
- Latest