Voters registration bubuksan ngayon
MANILA, Philippines — Magsisimula na ngayong Lunes ang voter registration ng Commission on Elections (Comelec) bilang paghahanda sa 2022 National and Local Elections (NLE) sa bansa.
Dapat sana ay Hulyo 6, 2020 pa ang muling pagsisimula ng voter registration para sa 2022 NLE, ngunit nagpasya ang Comelec na ipagpatuloy na ang voter registration ngayong araw matapos tuluyan nang ipagpaliban ng Kongreso ang May 11, 2020 Barangay and Sangguniang Kabataan Elections (BSKE).
Ang aplikasyon at pag-update ng record ay dapat na personal na isagawa ng botante sa Office of the Election Officer sa lungsod o munisipalidad kung saan nakatira ang isang aplikante, mula Lunes hanggang Sabado, kasama ang araw ng holidays, mula 8:00 ng umaga hanggang 5:00 ng hapon.
Kabilang sa mga maaaring magparehistro ay yaong mga tutuntong ng 18-taong gulang hanggang sa araw ng halalan o sa Mayo 9, 2020.
Ang mga botanteng nakapagrehistro na noong May 13, 2019 midterm elections ay hindi na dapat pang muling mag-apply.
Hindi muna kasama sa magkakaroon ng voter registration ang ilang lugar sa Batangas at Cavite na direktang naapektuhan ng pagputok ng Bulkang Taal.
Suspendido rin muna ang voter registration sa 24 na munisipalidad sa Palawan, na nakatakdang magdaos ng plebisito at maging sa Makilala, Cotabato, dahil naman sa lindol na naganap doon noong Disyembre 15.
Ang registration period ay magtatagal hanggang sa Setyembre 30, 2021.
- Latest
