Suspension ng Ombudsman sa DPWH exec, 4 pa giit ipatupad

MANILA, Philippines — Iginiit ng abogadong si Mikhail Lenin Bueno kay Department of Public Works and Highways Secretary Mark Villar na ipatupad na nito ang preventive suspension order na inutos ng Ombudsman laban sa isang regional director ng DPWH at 4 na iba pa.

Ayon kay Bueno, wala na umanong dahilan para hindi ipatupad ang kautusan ng Ombudsman laban kina DPWH officer-in-charge Region 5 Director Virgilio Eduarte; Atty. IV Eulogio Laboga, quality assurance and hydrology chief; Brenilda Mendoza, equipment management division chief; at Romy Gumban at Serafin Lago na hepe ng Road Heightening and Tide Embankment.

Wika pa ni Atty. Bueno, mahirap paniwalaan ang katwiran ng nasabing mga opisyal na wala silang natanggap na kopya ng kautusan noong Feb. 1, 2019 dahil umapela pa silang i-lift ito.

Nag-ugat ito sa reklamo ni Edgar Tiu na may-ari ng B. M. Marketing construction company nang i-disqualify siya sa public bidding nang kanyang inireklamo noong nagsisilbi pang assistant regional director sa DPWH region 8 si Eduarte at 4 pang opisyal.

Katwiran ni Eduarte ay hindi nakapasa sa technical requirements ang kumpanya ni Tiu.

Subalit lumilitaw na pumasa sa qualification ang B.M. Marketing Bids and Awards Committee para sa construction ng storm surge protector, road heighte­ning and tide embankment na may approved budget sa contract (ABC) ng P264,218,720.97.

Aprubado ni Ombudsman Samuel Martires ang 6-months suspension na walang suweldo laban kay Eduarte at iba pang opisyal noon pang Feb. 1, 2019 subalit hindi ipinatupad ng DPWH.

Dahil dito, muling lumiham nitong Enero 2, 2020 si Assistant Ombudsman Pilarita Lapitan kay DPWH Sec. Villar upang ipatupad ang preventive suspension.