Evacuees pumalo na sa higit 160K
MANILA, Philippines — Umabot na sa 160,000 indibiduwal ang nakakalat sa iba’t ibang evacuation centers sa mga probinsiya ng Batangas, Cavite at Quezon matapos pumutok ang bulkang Taal noong nakaraang Linggo.
Base sa 11 a.m. record ng Provincial Disaster Risk Reduction Management Council (PDRRMC) kahapon, 37,355 pamilya o 162,728 indibiduwal ang nananatili na sa mga evacuation centers.
Lumobo ang bilang ng mga apektadong pamilya matapos ipatupad ang lockdown sa Agoncillo, Alitagtag, Balete, Cuenca, Laurel, Lemery, Malvar, San Nicolas, Sta. Teresita, Taal, Talisay, parts of Lipa City, Mataas na kahoy at Tanauan City.
Inatasan ni Batangas Gov. at PDRRMC Chairman Dodo Mandanas ang lahat ng mga kinauukulang ahensiya na ibigay ang pangangailangan ng mga evacuees.
“Kapag humingi ng kailangan ay agad na ibigay ito at huwag nang padaanin pa sa interview dahil sa dinaranas na hirap ng mga ito,” sabi ni Mandanas.
Sinabi pa ni Mandanas na mas mataas ang totoong bilang ng mga evacuees dahil marami pa ang hindi nakasama sa bilang na nakikitira sa kanilang mga kamag-anak at kaibigan.
Pinaalalahanan din ni Mandanas ang kanyang mga nasasakupang Batangueño na sumunod sa mga tagubilin ng mga awtoridad lalo na sa mga lugar na ipinatutupad ang lockdown.
Lima pa lamang ang naitalang casualty kung saan tatlo ay dahil sa aksidente matapos maghatid ng relief operation at dalawa naman ang naiulat na inatake sa evacuation center.
- Latest