Polio case sa Pinas umakyat na sa 16
MANILA, Philippines – Pumalo na sa 16 ang bilang ng mga polio cases sa bansa, simula nang ideklara ang outbreak noong Setyembre 2019, matapos na makapagtala ng apat pang bagong kaso nito kamakailan.
Batay sa ulat ng Research Institute of Tropical Medicine (RITM) sa Department of Health, ang apat na bagong kaso ng sakit na pawang mga batang lalaki ay mula sa Quezon City, Maguindanao at Sultan Kudarat.
Ayon sa DOH, kinakitaan ng mga manipestasyon ng lagnat, pagtatae, pananakit ng kalamnan, asymmetric ascending paralysis at panghihina ng mga paa at kamay ang mga pasyente na kumpirmadong nagkasakit ng polio.
Patuloy na hinihikayat ng DOH ang publiko na pabakunahan ang kanilang mga anak laban sa polio.
Nakatakda umano ang mga gagawing pagbabakuna ng DOH mula Enero 20 hanggang Pebrero 2, sa lahat ng rehiyon sa Mindanao, at mula Enero 27 hanggang Pebrero 7 sa National Capital Region.
- Latest
