Manila Water, Ayala group umayuda sa Taal evacuees
MANILA, Philippines – Namahagi ng malinis na tubig ang Ayala group sa mga libu-libong pamilyang naapektuhan ng pagsabog ng bulkang Taal sa pamamagitan ng pagpapadala ng mga water tanker sa mga evacuation center sa Batangas at Laguna.
Sa report, ang 30 water tankers ay inisyal na nagdala ng 248 cubic meters ng tubig sa 19 evacuation centers sa Batangas at Laguna.
Kahapon, ang water tanks ay ikatlong ulit nang nagpa-refill sa Laguna Water kung saan halos 10,000 evacuees ang nabigyan ng libreng ‘potable water’ na kailangang-kailangan umano ng maraming pamilyang nagsilikas mula sa kanilang mga tahanan.
Nitong January 13, 2020, nagpadala naman ang Manila Water ng 30 water tanker trucks sa Balara headquarters sa Quezon City, at naghatid ng 248 cubic meters ng inuming tubig sa 19 evacuation centers sa Batangas at Laguna.
Sa pakikipag-koordinasyon sa Batangas Provincial Disaster Risk Reduction at Management Office (Batangas PDRRMO) ay patuloy ang pag-ayuda ng Manila Water sa mga nasa evacuees sa bayan ng Sto. Tomas, Tanauan City, Lipa City, Batangas City, San Pascual, San Luis at Cuenca, kabilang ang Tagaytay City at Alfonso sa Cavite, upang mabigyan ang mga ito ng malinis na inuming tubig.
Namahagi rin ang Manila Water Foundation ng 2,000 units ng 5-gallon bottles ng potable water sa mga evacuees sa Sta. Teresita at Bauan, Batangas, maging ang mga nasa munisipalidad ng Agoncillo, San Nicolas, Laurel, Taal at Talisay.
- Latest
