K-Grade 3 students dapat nakapokus lang sa reading, math, GMRC subjects – solon
MANILA, Philippines — Iminumungkahi ng isang kongresista sa Department of Education (DepEd) na huwag labis na kargahan ng subject ang mga estudyante ng kindergarten hanggang Grade 3, sa halip ay tumutok na lamang sa reading, mathematics at good manners and right conduct o GMRC.
Ayon kay Pasig Rep. Roman Romulo, chairman ng House Committee on Basic Education and Culture, simula noong Agosto ngayong taon, iminumungkahi na umano niya sa DepEd na bawasan ang bilang ng mga subjects sa Kindergarten hanggang Grade 3 para naka-focus lang sila sa basic.
Ito ay ang GMRC, mathematics at reading na dapat umanong tadtarin na dapat makapagbasa, matutong magbasa at makapag-comprehend Grade 1 pa lamang.
Ginawa ng kongresista ang pahayag matapos maitala ang Pilipinas na pinakamahina sa 79 bansa pagdating sa student reading comprehension base na rin sa resulta ng 2018 Program for International Student Assessment (PISA).
Paliwanag pa ni Romulo na ang resulta ng Pilipinas sa PISA noong 2018 ay hindi malayo sa resulta ng National Achievement Test (NAT) sa Grade 6 at Grade 10 students para sukatin ang kanilang competencies.
Kaya kung titingnan umano ang resulta o scores ay halos pareho naman at hindi malayo kahit na ang NAT ay sa Pilipinas lamang kaya hindi umano dapat bigatan ng iba-ibang subjects ang Grade 1-3 at basic lamang ang ibigay sa kanila.
Nangako na rin ang DepEd na magkakaroon ng agresibong reporma sa basic education system sa gitna ng nasabing mga ulat.
- Latest
