Duterte umaming mahina na ang katawan

MANILA, Philippines — Dahil sa kanyang edad, aminado si Pangulong Rodrigo Duterte hindi na kalakasan ang kanyang katawan pero kaya pa niyang gampanan ang trabaho bilang Pangulo ng bansa.

Sa eksklusibong panayam ng CNN Philippines sa Pangulo, sinabi nito na huwag na siyang tanungin kung nasa mabuti ang kanyang kalusugan.

“Seventy four years old, ‘wag mo akong tanungin if I am at the best, at the peak of my health, I am not,” pag-amin ng Pangulo.

Pero kung pag-uusapan aniya ang pagtupad sa kanyang trabaho ay kaya pa niya ito.

“For purposes of performing my functions as President, I’m alright,” sabi ni Duterte.

Ipinagmalaki pa ng Pangulo na kaya pa niyang sumakay sa kanyang motorsiklo.

Matatandaan na inamin kamakailan ni Duterte na mayroon siyang myasthenia gravis na isang uri ng neuromuscular disease. Pinahihina umano ng nasabing sakit ang mga muscles na nagko-kontrol sa paggalaw ng mata at pilik mata.

Inamin din ng Pangulo noong Nobyembre 17 na marami na siyang nararamdamang sakit dahil sa kanyang edad.

“All of the ailments, I have them because I am already old.... Life has begun to take its toll on my health,” sinabi noon ni Duterte.