LPG may taas presyo

MANILA, Philippines — Nakatakdang magtaas ng presyo ang mga kumpanya ng langis at iba pang distributor ng liquefied petroleum gas (LPG) ngayong Disyembre 1.
Pinangunahan kahapon ng Petron Corporation ang dagdag-presyo ng P0.25 kada kilo ng kanilang Gasul at Fiesta Gas.

Katumbas ito ng P2.75 dagdag presyo sa bawat 11 kg. na tangke nito na epektibo kaninang 12:01 ng hatinggabi ngayong Linggo.

Bukod dito, nagtaas rin ang Petron sa presyo ng Auto-LPG ng P0.15 kada litro na karamihan ay ginagamit ng mga taxi.
Aasahan naman ang pagsunod ng iba pang kumpanya langis tulad Shell na may Solane ng kaparehong dagdag-presyo sa LPG at Auto-LPG kahit hindi pa naglalabas ng abiso ang mga ito.

Ang bagong dagdag-presyo ay bunsod ng pagtaas ng contract price ng LPG sa pandaigdigang pamilihan.