Napatay na mga sundalo sa Samar pinarangalan ni Duterte
MANILA, Philippines — Personal na dinalaw at binigyang-parangal ni Pangulong Rodrigo Duterte ang mga sundalong napatay at nasugatan matapos makaenkuwentro ang mga miyembro ng New People’s Army (NPA) sa Borongan City, Eastern Samar noong Nobyembre 11.
Nagtungo ang Pangulo sa Camp General Vicente Lukban sa Catbalogan City kung saan pinagkalooban niya ng award na “Order of Lapu-Lapu, Rank of Kalasag” ang mga napatay na sundalo.
Ang mga ito ay sina SSgt. Rex Jadulco, Sgt. Ronaldo Go, Sgt. Limar Banug, Cpl. Junmar Buranday, Cpl. Kent Lloyd Agullo, at Pfc. Charlie Del Rosario.
Bukod sa mga napatay na sundalo, 24 na iba pa ang nasugatan sa engkuwentro.
Ang 16 sa mga sugatang sundalo na naka-confine sa Camp Lukban Station Hospital ay binigyan ng “Order of Lapu-Lapu, Rank of Kampilan” ng Pangulo.
Ang apat namang iba pa na nasugatan sa kahiwalay na engkuwentro ay binigyan din ng award na Order of Lapu-Lapu.
Nakatanggap naman ng tulong pinansiyal ang dependents ng mga sundalo mula sa gobyerno samantalang ang ibang suporta ay nagmula sa Comprehensive Social Benefit Program.
Maging ang mga nasugatang sundalo at pulis ay binigyan din ng pinansiyal na suporta.
- Latest
