Mga pulis na may kaso walang year-end bonus

MANILA, Philippines — Walang matatanggap na year-end bonus ang mga pulis na nahaharap sa kasong administratibo at kriminal.

Ayon kay PNP Spokesperson P/Brig. Gen. Bernard Banac, naka-hold ang bonus ng mga pulis na may kaso bilang bahagi ng disciplinary policy ng PNP.

Ginawa ni Banac ang pahayag kasabay ng pag-anunsyo na matatanggap na sa mga ATM accounts ng mga pulis ang kanilang mga year-end bonus na katumbas ng isang buwang sahod kasama ang P5,000 cash gift.

Inihayag naman ni Police Brig. Joselito Vera Cruz, Director ng Finance Service na ang mga PNP personnel na hindi pa naka-enroll sa ATM payroll system ay makakatanggap naman ng mga tseke sa pamamagitan ng Regional Finance Service Offices.