7 na patay sa Mindanao quake
MANILA, Philippines — Pumalo na sa pito ang bilang ng mga nasawi sa 6.3 magnitude quake na tumama sa iba’t ibang bahagi ng Mindanao.
Sa report ng National Disaster Risk Reduction and Management Council (NDRRMC), ang dalawa pang nasawi ay nagmula sa bayan ng Alamada at Makilala, North Cotabato.
Ang iba pang mga namatay sa lindol ay mula naman sa Regions XI, XII at Bangsamoro Autonomous Region in Muslim Mindanao (BARMM).
Kabilang sa mga ito ay dalawang bata, isa rito ay 7 anyos na batang babae na nadaganan ng pader sa Tulunan, North Cotabato at 2-taong batang babae rin sa Magsaysay, Davao del Sur na nabagsakan ng mga debris. Isa naman ang inatake sa puso bunga ng insidente.
Samantala, mayroon ding 93 sugatan mula sa tatlong nabanggit na rehiyon.
Umaabot sa 334 ang mga nawasak na bahay at istraktura, 1,365 ang partially damaged o may kabuuang pinsala na 1,699.
Nasa 1,653 pamilya o 8,265 katao naman ang naapektuhan ng lindol sa 52 barangay sa Region XI at XII kung saan 352 katao ang pansamantalang nanunuluyan sa mga evacuation centers habang nasa 547 pamilya o 2,673 katao ang nakituloy sa labas ng mga evacuation centers sa kanilang mga kaanak sa ibang lugar.
Samantala nasa 1,031 bahay, 269 eskuwelahan, 19 health centers, 23 pampublikong istraktura, anim na simbahan at 10 pribado at komersiyal na establisimyento ang nagtamo ng pinsala.
Naitala naman sa 39 lugar ang nawalan ng kuryente na naibalik din ng sumunod na araw.
Bunga nito, nasa 46 lugar sa Regions XI, XII at BARMM ang nagsuspinde ng klase at trabaho noong Huwebes bunga ng matinding pinsala ng lindol.
Isinailalim na sa state of calamity ang Makilala at M’lang.
- Latest
