DOH, WHO nagbabala vs panganib ng e-cigarettes

MANILA, Philippines – Muling pinaalalahanan ng Department of Health (DOH), World Health Organization (WHO) at medical society ang publiko hinggil sa mga panganib na dulot ng paggamit ng electronic cigarettes (e-cigarettes).

Sinabi ni Health Secretary Francisco Duque III na, kumpara sa sigarilyo mas marami ang halong nakalalasong kemikal sa e-cigarettes.

Babala pa ng kalihim, mapanganib din ang e-cigarettes maging sa mga hindi gumagamit, ngunit nakakalanghap ng second-hand smoke nito. Malinaw rin aniya na hindi para sa mga bata ang e-cigarettes.

Sa US ay iniimbestigahan na ang 1,299 indibidwal na hinihinalang nagkasakit dahil sa e-cigarettes, gayundin ang pagkamatay ng 26  katao.

Dahil dito, hinikayat ni Duque ang mga kabataan, gayundin ang mga buntis, na iwasan ang paggamit ng e-cigarettes upang makaiwas sa mga sakit na dulot nito.

Sakali aniyang gumamit ng e-cigarettes at iba pang vaping products at nakakaramdam ng mga sintomas ng sakit sa respiratory system ay dapat nang kumonsulta sa doktor.