7 PMA cadets sa Dormitorio hazing isasalang sa court martial
MANILA,Philippines — Isasalang sa court martial ang pitong kadete na sangkot sa hazing na ikinasawi ni Cadet 4th Class Darwin Dormitorio.
Ayon kay Brig. Gen. Romeo Brawner Jr., PMA Corps of Cadet Commandant, napagdesisyunan ng mga opisyal na kailangang dumaan sa court martial ang mga upper classmen ni Dormitorio bilang bahagi ng kasong administratibo laban sa mga ito.
Kabilang sa mga ito sina PMA Cadets 3rd Class Shalimar Imperial, Felix Lumbag Jr., John Vincent Manalo, Julius Carlo Tadena at Rey David John Volante, Cadet 2nd Class Christian Zacarias, at Cadet 1st Class Axl Rey Sanopao.
And mga ito ay una nang sinampahan ng kasong murder at paglabag sa anti-hazing at anti-torture law sa Baguio City Prosecutors Office.
Lilitisin sila sa paglabag sa Article of War (AW) 96 conduct unbecoming a gentleman and an officer at AW 97 (conduct prejudicial to good order and military discipline).
Pansamantala ay sa PMA muna ang kustodya ng mga kadete at sa oras na simulan na ang court martial ay itu-turnover na ang mga ito sa General Headquarters sa Camp Aguinaldo.
Samantala, bahala na ang liderato ng AFP na desisyunan kung isasalang din sa court martial ang mga Tactical Officers ng nasabing mga kadete na sina Major Rex Bolo at Capt. Jeffrey Batistiana, at PMA Hospital doctors na sina Col. Cesar Candelaria, Capt. Apple Apostol at Maj. Ofelia Beloy.
- Latest
