DOJ ang bahala sa criminal liability ni Albayalde – Palasyo

MANILA,Philippines — Ipapaubaya ng Palasyo sa Department of Justice (DOJ) ang posibleng criminal liability ni resigned PNP chief Oscar Albayalde.

Sinabi ni Presidential Spokesman Salvador Pa­nelo, nakadepende sa resulta ng Senate investigation kung mayroong criminal liability si Albayalde dahil sa pagkakadawit sa isyu ng drug recycling ng mga tinaguriang ‘ninja cops’.

Ayon naman kay Albayalde, trabaho ng mga prosecutor ng DOJ ang pagdetermina sa probable cause ng criminal offense ng isang akusado.

Magugunita na nagsasagawa rin ng reinvestigation ang DOJ sa 13 ‘ninja cops’ kaugnay sa drug case ng mga ito sa nangyaring drug operations noong 2013 sa Mexico, Pampanga.

Kabilang sa ipinatawag ng DOJ panel ay ang team leader ng drug operations na si Maj. Rodney Baloyo IV na nakakulong sa Bureau of Corrections sa New Bilibid Prison matapos ma-contempt sa Senado.

Sumailalim sa automatic review ang kaso ng 13 ‘ninja cops’ matapos itong mabasura sa prosecution level at ang reinvestigation ay naka-focus sa paglabag ng mga ito sa Republic Act 9165, particular sa Sections 27 (misappropriation), 29 (planting) at 32 (custody and disposition) na nabasura noong 2017.

Si Albayalde ang provincial commander ng Pampanga ng maganap ang nasabing controversial drug operations.