‘Pangho-hostage’ ng ospital sa pasyente, itigil! - Go
MANILA, Philippines — Nangako si Sen. Bong Go na ipatitigil na niya ang iligal na gawi ng mga ospital na “pangho-hostage” sa mga pasyente, partikular sa mga bangkay, kapag hindi nakababayad ng hospital expenses ang kanilang pamilya.
Dismayado si Go dahil sa kabila aniya ng umiiral na batas, talamak pa rin sa maraming ospital ang iligal na pagdedetine sa mga pasyente.
Pinagtibay ang Republic Act 9439 noong 2007 upang masolusyonan ang isyu ng hospital detention.
Sa ilalim ng batas, pinapayagan ang mga pasyente na makalabas ng ospital o clinic kung mayroon silang promissory note o pangakong babayaran ang kanilang obligasyon. Gayunman, hindi kasama rito ang mga pasyenteng na-confine sa private rooms.
Bagama’t inihayag ang kanyang concern para sa mga pasyente na iligal na idinedetine sa ospital, sinabi ni Go na kinakailangan ding maprotektahan ang kapakanan ng mga pagamutan mula sa mga abusadong pasyente.
Sinabi ni Dr. Rosendo Sualog, medical specialist ng DOH na batay sa impormasyon, kadalasang nangyayari ito sa mga pasyenteng na-confine sa private rooms at hindi makabayad ng obligasyon.
Sa kaso ng mga namatay na Muslim, ikinuwento ni Go na, sa Davao City ay may nakatalaga nang sasakyan para sa pagbibiyahe ng bangkay sa kanilang bahay para agad na mailibing base sa Islamic belief.
- Latest
