Palasyo pumalag sa pakikialam ng US Senate sa kaso ni de Lima
MANILA, Philippines – Pinalagan ng Malacañang ang pag-apruba ng US Senate Appropriations Committee sa isang pending bill na naglalayong pagbawalang makapasok ng Estados Unidos ang mga opisyal ng Pilipinas na sangkot sa pagpapakulong kay Sen. Leila de Lima.
Sinabi ni Presidential Spokesman Salvador Panelo, ang hakbang na ito ay isang lantarang panghihimasok sa domestic legal process ng bansa lalo ang kasong dahilan ng pagkakakulong kay Sen. de Lima ay kasalukuyang dinidinig ng korte.
Ayon kay Panelo, layunin nitong ma-pressure ang mga independent institutions kaya malinaw itong pakikialam sa soberenya ng Pilipinas.
Maituturing daw itong insulto sa competence at kakayahan ng mga otoridad dahil pinalalabas ng US Senate panel na may monopolyo sila sa kung ano ang tama at makatarungan.
Tinatrato umano ang ating bansa bilang inferior state na hindi kuwalipikadong pangasiwaan ang sariling internal affairs.
Kahit sinong Pilipino daw, kakampi o kritiko man ng administrasyon ay dapat magalit at mabastusan sa nakakainsulto at “offensive” na hakbang ng US Senate panel.
Sa tweet ni US Sen. Dick Durbin, pinuri nito ang panukala at tinawag na “politically motivated” ang pagpapakulong kay de Lima.
Isa si Durbin sa mga mambabatas na nagsulong ng resolusyon noong Abril na kumokondena sa detensiyon ni de Lima. Nanawagan din ito na palayain na ang senadora. Malou Escudero
- Latest
