Rearrest sa GCTA-freed convicts ipinatigil
MANILA, Philippines — Sinabi kahapon ni Interior Secretary Eduardo Año na inatasan niya ang Philippine National Police (PNP) na ihinto muna ang pagdakip muli sa mga convict na napalaya dahil sa kontrobersiyal na Good Conduct Time Allowance (GCTA) Law.
Sa isang pulong-balitaan, sinabi ng kalihim na hindi pa natatanggap ng pulisya ang “malinis” na listahan ng mga sentensiyadong preso na napalaya sa ilalim ng GCTA.
Tiniyak naman ni Año sa publiko na ipagpapatuloy ng mga police tracker teams ang pagsubaybay sa mga aktibidad ng mga convict na nabigong sumuko bago ang taning noong Setyembre 19.
“Ang instruction ko sa PNP, okay let us put on hold for a while, ituloy natin ang pag-track, huwag muna tayo mag-arrest,” dagdag niya.
Hanggang kahapon ng umaga, nabatid sa Department of Justice (DOJ) na may kabuuan nang 2,221 convicts ang sumuko. Mas mataas ito kumpara sa 1,914 unang listahan ng mga napalayang convict sa heinous crime.
- Latest
